Hadton Hunyo 1992, an Diyos naghatag ha amon pamilya hin usa nga balay nga himo hin kahoy didto ha Banez Ville II Fatima, syudad han Tacloban, Leyte, Philippines. An mga mahigugmaa-on nga katawhan han Diyos ha Bells Yew Green Chapel kaupod han ira Pastor nga hira Pastor Arthur ngan Mary Rivers, ngan iba pa nga mga kabugtuan dida ha Ginoo sugad ha ira Peter ngan Jackie Goodes, Hettie, an usa nga harap nga babaye maduroto nga nagtirok ha iya mga sinsilyo ngan ini iya gin pandara ha amon pinaagi kan Pastor Arthur ngan Mary Rivers. Kami nagpasalamat sa Diyos ha amon pag-ukoy nga malipayon hini nga balay sulod ha lima ka tuig nga waray gud problema. Umabot hin napulo ka tuig an amon pag-inukoy hini nga balay piro paghuman han lima ka tuig inabot an panahon nga an mga hag-rani nga mga barangay nagigin Housing Subdivision. Tungod ha ira hagta-as nga pagtambak hin tuna, ini in naghatag ha amon hin problema han pagbabaha. Kon kat-uran an baha halarum gud ngan an tubig nasakob ngadto ha amon balay. Danay an tubig han baha halos umabot ha amon hawak an kahilrom. Maabot hin tag-usa ka bulan ngan hin subra pa antis ini humubas. An tanan nga mga hugaw ngan basura nagtarambak ngadi ha amon ini nagigin urok-yanan han nga lamok, nga kagaw nga naghatag ha amon hin sakit, ngan ha katapus-tapusan ini nakapadumog han amon balay nga kahoy. Amon gin-tapod ngadto ha Diyos an amon makuri nga kahimtangan. Kami nagtu-o nga hiya andam ngan makakahimo ha pagtagbu ha ngatanan nga amon gin-kikinahanglan. Nangaro kami ha Ginoo hin usa ka bag-o nga balay ha lugar nga dire na mababaha-an. Tungod han amon dako nga pagto-o ha Iya kami nagmalipayon nga nagpasalamat ngadto ha Diyos bisan paman naroba an amon balay, tungod nga maaram kami nga an Diyos maaram liwat ngan may-ada panuyo han ngatanan nga nahihinabo ha amon kinabuhi sugad nga kami iya mga anak. (Rom. 8:28). 

Han bulan han Marso 2001, an Diyos nag-padara han iya surugo-on nga Ebanghilista Tony Daly tkang ha England para han pagwali han pulong han Diyos ha nga bilangu-an, ngan mga krusada dinhi ha Pilipinas. Ha waray pa hiya umabot gin-andaman namon hiya hin usa nga kwarto didto nga iya mao-ukyan didto ha Don’s Cabin. Diri kami maaram nga an sapit hito nga hotel may maaringasa nga Videoke Bar nga amo an hinungdan nga hiya waray pagka-hingaturog han bug-os nga gab-i. Tungud hadto karuyag hiya nga gumawas han hotel ngan adto na makaturog ha amon balay o ha iba nga balay nga harani ha amon. Hadto ngahaw nga gab-i bumuhos an dako nga uran ngan bumaha. Han pag-kakita niya hadton makuri nga kamutangan hiya nagyakan han iya kalugaringon ngan nag-siring “An Ginoo nagpakanhi ha akon dinhi nga lugar nga may-ada katuyuan.” Hiya nag-ampo ngadto ha Diyos ha pag-siring, “Ginoo ano ba an imo bubuhaton para han mga Lerion?” An Diyos nag-siring han iya kasing-kasing nga ihatag an iya kwarta para kunta ha pag-paayad han iya sarakyan. Ito nga kwarta igin-butang niya ha bangko para ha pagtikang han Higher Ground Fund amo adto an katinikangan han mga panalangin han Diyos para nga kami maka-balay hin bag-o. An Diyos nag-gamit hin mga tawo nga dire namon kilala ha personal para matuman an Iya gin-saad pina-agi han iya mga pulong. 

An Diyos nag-parig-on ha amon pina-agi han iya mga pulong mahi-unong han katumanan han iya igin saad nga usa ka maupay nga lugar para ha amon pamilya. Amon gin-surat ha papel ito nga mga pan-lantaw han amon pag-too nga naghulat kami han pag-bubuhaton han Diyos. (Habakkuk 2:2-3). Mintras kami nag-huhulat inabot gihapon an mga pag-sulay han amon pag-too. Salit nag-ampo kami hin usa nga pag-panugyan didto ha Ginoo sugad han nahisurat ha Habakkuk 3:17-18. Kami hin nag-kaada hin diterminasyon ha pag-padayon han pag-kamatinumanon dida ha pag-alagad ha Diyos may-ada maupay nga balay o kon waray. An amon kalipay napasukad dida han Diyos nga amon magta-ralwas. Kunta madiskurahi kami piro an Diyos nag-parig-on han amon pag-too pina-agi han iya mga pulong mga nag-siring, an salapi Akon, ngan an bulawan Akon, nagsiring an Ginoo han mga panon.” (Hageo 2:8-9). Ngan damo pa nga pulong han pag-parig-on ngan mga pag-patapod han Ginoo ha amon nga dire gud mawawaray gamit an amon pag-sarig ha iya. Sugad han nahisurat han libro ni Isaias 59:21 ngadto ha kapitulo 60:1;16-18. Ini nga balay natukod nga pagpamatuod ngadto ha kalibutan para ha kahimaya-an han Diyos. Hiya ma-upay gud nga Diyos nga dire gud na-pakyas ngadto ha tanan nga nasarig ha Iya. 

(Epeso 3:20). Usa ka maupay nga butang an pag pasalamat sa Diyos kay hiya matinumanon gud! 

Ano man ginbuhat han Diyos ngadto ha iba pwedi gihap ini Niya himuon ngada ha imo! Kay-ano nga dire nimo Hiya surayan! 

Pastor William, Vianney ngan Pamilya